DIE Paarl Rugby-administrateurs het verneem dat Jaco van Wyk, die Paarl Post sportverslaggewer, hom aangesluit het by Boland Rugby as skakelbeampte. Ons wil hom bedank vir sy goeie diens aan die gemeenskap.
Jaco het altyd die ekstra moeite gedoen vir sportberiggewing in die Paarl Vallei en het alle sportsoorte en sportgebeurtenisse regverdige dekking gegee.
Hy het geen moeite ontsien om hom te vergewis van feite nie en het nie geskroom om sensitiewe sportaangeleenthede aan te pak en in die regte konteks tot die beskikking van die Paarl Post lesers te stel nie.
Daarbenewens was Jaco ’n brugbouer in die Paarl-gemeenskap en het nie onderskeid getref tussen mindergegoede woonbuurte en meer gegoede woonbuurte of meer belangrike sportsoorte of minder belangrike sportsoorte of sportgebeurtenisse nie.
Die Rugby-kode en Rugby-streek wil graag vir Jaco bedank vir sy bydrae om sport in Paarl te bevorder en wil hom graag sterkte en voorspoed toewens in sy loopbaan. Ons wens sy opvolger, Sieb Sieberhagen, sterkte toe.
