Twee mans is beseer toe die vragmotor waarin hulle gery het, omgeslaan het op Dutoitskloofpas. Die voorval het Maandagoggend plaasgevind, toe die bestuurder van die vragmotor, gelaai met ’n vol vrag koeldrankbottels, beheer oor die voertuig verloor het op die ou pas, in die rigting van Worcester. Die vragmotor het omgeslaan en Gerald Hendrikse, van Brackenfell, is agter die stuur vasgepen. Nadat reddingswerkers hom bevry het, het hy self uit die wrak geklim met ’n bloedbesmeerde gesig en vergruisde hand. Hier help reddingsbeamptes, Callie Claasen (links) en Jacobus Fortuin, vir Hendrikse na ’n wagtende ambulans. Die Hugenote-tonnel is Saterdagmiddag ook vir etlike ure gesluit, toe vier voertuie inmekaar vasgery het in die tonnel. Niemand is ernstig beseer nie.Foto’: Lise Beyers
