Bekende oorlede
2010-09-23
’n VOORMALIGE stadsklerk van die Paarl, Hennie Liebenberg (75), is Saterdag in Huis Vergenoegd se siekeboeg oorlede ná ’n kort siekbed weens kanker. Liebenberg het ná matriek by die Paarl Munisipaliteit begin werk as meterleser. Hy het hom in sy 42 jaar as munisipale amptenaar opgewerk tot heel bo en was ’n alombekende persoon op die dorp. Hy was later lid van die Raad van Stadsklerke en die vise-president van die SA Munisipale Werkersvereniging. Hy was tien jaar lank voorsitter van die Paarl Rugbyklub en ’n gewaardeerde lewenslange erelid van die klub. Liebenberg het in die Strand afgetree, waar sy vrou, Lita, vyf jaar gelede oorlede is. Hy is ’n paar maande gelede in Huis Vergenoegd se siekeboeg opgeneem weens verswakkende gesondheid. Hy word oorleef deur drie dogters (Annemarie Meyer van Humansdorp, Paula Bester van Paarl en Karen Beukes van Ceres) asook sewe kleinkinders. Die begrafnis is vanmiddag om 15:00 in die Toringkerk.
More
News
|
