Vlugvoetiges in aksie
2010-10-21
BOLAND se voorste klub Sewesspanne meet eerskomende Saterdag kragte in Wellington, vir die jaarlikse Boland Sewestoernooi by Boland-stadion. Na afloop van dié toernooi sal 24 spelers gekies word vir deelname aan ’n interprovinsiale Sewestoernooi op 5-6 November te Florida Park. Klubspanne wat eerskomende Saterdag hul vlugvoetigheid ten toon gaan stel is Napier, Rangers (Bredasdorp), Robertson, Proteas (De Doorns), Roses United (Wellington), Wellington Rugbyklub, Delicious (Ceres), Hamlet, Samoa (Moorreesburg), Piketberg, Velddrif en St Helenabaai. Die span wat as die algehele kampioen gekroon word, sal R5000 prysgeld in die sak steek. Die naaswenner (verloorder in die finaal) sal R3000 prysgeld ontvang. Die wenner in die Plaatfinaal sal R1500 wen en die verloorder in die Plaatfinaal sal R500 wen. Alle klubs moet Saterdag 11:00 by die Boland-stadion aanmeld, waartydens die program aan die klubs voorsien sal word. Alle wedstryde sal op die hoofveld van die Boland-stadion beslis word.
More
News
|
