Veritas-glorie vir kelders
2005-10-06
VERSKEIE plaaslike wynkelders is bekroon met dubbelgoud by vanjaar se Veritas Toekennings tydens ‘n galadinee in Kaapstad.
Die toppresteerders met drie dubbelgoud elk is Boplaas en Simonsig.
Avondale Vineyards van die Paarl het dubbelgoud verdien met twee wyne - die 2001 Avondale Graham Reserve (rooi versnitwyn) en 2003 Avondale Syrah behaal.
Bellingham het dubbelgoud met sy 2004 Maverick Chenin Blanc (houtverouderd) behaal, Smook Wines is bekroon met ’n dubbelgoud medalje vir sy 2003 Anthony Smook Shiraz Reserve, Boland vir sy Cabernet Sauvignon No 1 Reserve, Graham Beck vir Pheasants’ Run Sauvignon Blanc en The Joshua (albei rooi versnitwyne), asook
Môreson Pinotage en Alleé Bleue L’Amour Toujours 2004. Graham Beck het ook drie goud ingepalm.
Saronsberg se wynmaker en wingerdboukundige, Dewaldt Heyns, het met sy 2004 Saronsberg Full Circle (rooi versnitwyn) en 2004 Saronsberg Shiraz, dubbelgoud medaljes aan dié Tulbaghse wynmakery besorg.
Goue medaljes is toegeken aan plaaslike kelders Anura (2) Boschendal (2), Bovlei, Coleraine, Graham Beck (3), Glen Carlou, Monis (2), Nederburg (2), Perdeberg, Simonsvlei, Wamakersvallei en Windmeul.
Uit die rekord 1 738 ingeskrewe wyne is 43 (2,5%) met dubbelgoud medaljes en 105 (6%) met goud medaljes bekroon. Altesaam 401 en 691 wyne het onderskeidelik silwer- en brons medaljes verower.
Naas rooi versnitwyne, wat met 11 dubbelgoud medaljes pronk, spog Shiraz wyne met sewe dubbelgoud, Cabernet Sauvignon en Pinotage met vyf elk, Chardonnay met vier, Chenin Blanc, Sauvignon Blanc en Port met drie elk, en Cabernet Franc en Muskadel met een elk.
Die Veritas Toekennings – wat sedert 1992 deur die Suid-Afrikaanse Nasionale Wynskouvereniging (SANW) aangebied word – is die land se grootste kompetisie vir markklaarwyne.
More
News
|
