Paarl-Oos oordonder Wellington maklik
2010-12-09
PAARL-OOS se eerste krieketspan het die afgelope naweek korte mette met Wellington-CPUT gemaak en sodoende verseker dat hulle steeds in ’n goeie posisie is om as liga-wenners gekroon te word. Hulle het Saterdag in Wellington eerste gaan kolf en 240/8 aangeteken. Hulle beste kolwers was Bruce Miller (43 3x4 2x6), Garth Lewis (28 5x4), Wilton van Neel (53 9x4) en Christiaan Oosthuizen (25 1x4 2x6). Wellington loop hulle toe vas in begeesterde boul- en veldwerk en word vir net 119 lopies uitgeboender. Paarl-Oos se beste boulers was Cloete (5-1-11-2), Zynodien Fredericks (9-3-21-2), Wayne Minnie (7-0-24-2), Jack Daniëls (9-1-18-1) en Jade Adams (7-1-22-1). Saterdag speel Paarl-Oos I teen Van der Stel op die New Orleans-velde. Dit begin om 10:00. Paarl-Oos se tweedes het ook Saterdag op ’n drafstap met Mbekweni I afgereken. Mbekweni het eerste gaan kolf en kon slegs 124 (almal uit) aanteken. Bjorn Hollenbach (79 9x4 2x6) en Curt Julies (25 2x4) het goed gevaar met die kolf en het op ’n drafstap 125/2 aangeteken om sodoende die wedstryd te wen. Julies (6-0-13-5) en Enrico Appollis (5-0-23-2) was Paarl-Oos se beste boulers.
More
News
|
