Droomseisoen vir Hugenote se eerste krieketspan
2011-03-10
DIE onlangse 7-lopie oorwinning vir die eerste krieketspan van Hugenote Hoërskool oor Hoërskool Gimnasium in ’n Twintig/20-wedstryd het die kroon gespan op die blink vertonings wat die afgelope seisoen deur die Wellingtonners gelewer is. In ’n uitstekende wedstryd teen Gimnasium, waarin die uitslag na een of anderkant toe kon swaai, het Hugenote uiteindelik met die louere weggestap. Vandag is dit nog ’n groot toets wanneer Hugenote se eerste span die Wes-Kaap-kampioene, Wynberg Boys’ High, in ’n Twintig/20-wedstryd pak. In dié seisoen het Hugenotemet Stellenbosch Hoër (met 7 paaltjies), Schoonspruit (135 lopies), HS Swartland (wen met 9 paaltjies), HTS Drostdy (wen met 107 lopies) en Paarl Gimnasium afgereken. In hul wedstryd teen Hoërskool Framesby het Hugenote met die derde laaste bal met 3 paaltjies verloor. In die Hugenote teen Paarl Gimnasium Twintig/20 -wedstryd het die Wellingtonners 105/10 aangeteken. Met die kolf het Ignatius van der Merwe (40) en Kurt Mackay (20) uitgeblink. Paarl Gim kon net 98/10 aanteken met Francois Bloem 2/29, Ignatius van der Merwe 4/15, Michiel du Toit 2/19 en Lizaad Williams 1/8, uitblinkers met die bal. Hugenote wen met 7 lopies. Ignatius van der Merwe (o.17B), Nelius Hauptfleisch (o.17A) en Lizaad Williams (Boland o.18, SAo.18, SA o.19) het tydens die Desember-vakansie goeie rekenskap van hul vermoëns gegee.
More
News
|
