Hitte demp nie gees by rugbyfees
2011-03-24
DIE Young Standards 120 feesjaar-rugbytoernooi het Saterdag in versengende hitte op die Faurestraat-stadion afgeskop met wedstryde tussen klubs in WPRFU wat ouer as 100 jaar is. Die Paarlstreek-klubs het bewys dat dié streekkompetisie meer gedug is as die meeste divisie-kompetisies van WPRFU met al drie streekklubs wat spanne van die Kaap ore aangesit het. Violets het in die eerste wedstryd van die dag vir Manenberg Rangers met 28-0 geklop waarna Riverstones die span van Perseverance van die veld gespeel het en met 68-19 verpletter het. Young Standards het in die laaste wedstryd van die dag vir Retreat in ’n meer gelyk-op wedstryd met 19-11 geklop. In die plaaslike derby het ’n jong onervare Young Peoples-span vir Paarl-klub met 29-12 geklop. Paarl se o.20 span het egter vir die nederlaag vergoed en Young Peoples met 26-11 geklop. Young Standards se o.20 span klop die span van Retreat met 16-9, terwyl die o.16 en o.14 spanne van Young Standards ook aan die wenkant was. Die o.20 spanne van Paarl-klub en Young Standards meet vanaand om 19:00 kragte by die Boy Louw B-veld. Saterdag speel die juniorspanne en o.20 span van Young Standards teen Young Peoples ook by die Boy Louw-velde. Wedstryde begin om 09:00. Die senior span speel teen Counties by Wemmershoek. Young Standards bied op 23 April ’n Tien-aan-’n-Kant-Toernooi te Daljosafat-stadion vir o.20 en senior spanne aan. Die o.20 wedstryd begin om 13:00 terwyl die senior finaal teen 21:30 afgehandel behoort te word. Slegs 8 spanne sal in die onderskeie kompetisie teen mekaar deelneem. Vir navrae, skakel die sekretaris by 082-731-4879.
More
News
|
