DIE meeste van ons het al seker die ondervinding gehad wanneer jy ’n navraenommer (soos Telkom) skakel dat jy in ’n onverstaanbare taal of Engels geantwoord word.
Vra jy as kliënt vriendelik om in Afrikaans bedien te word, is die persoon nie altyd baie behulpsaam nie.
Dienslewering bereik nuwe laagtepunte in ons land.
By die Toerisme Inligtingskantoor op Wellington gaan kry ek ’n permit vir ’n staproete in Bainskloof.
Vroeër was ’n vriendelike Afrikaanssprekende personeellid (bruin) baie effektief behulpsaam en het meer moeite gedoen as wat nodig is.
Toe ek weer eendag daar kom, was daar ’n persoon sonder enige kennis van die werk, of van Afrikaans!
Die Toerisme Inligtingskantoor is mos elke gemeenskap se vertoonvenster en behoort die dorp, besighede en gemeenskap so baie goed te ken en met geesdrif diens te lewer – dit was nie my beste ervaring nie.
My nuutste ervaring was met kieserregistrasie. By die lokaal waar ons moes gaan registreer, was alle aanwysings Engels en vorms was net in Xhosa en Engels beskikbaar. By verre die meeste mense in ons omgewing is Afrikaanssprekend, maar ons tel mos nie meer nie. Hulle mors met ons mense.
DBH Snr, Wellington
