ANC vat Wyk 13 in tussenverkiesing
2005-10-20
“NOU is Sienah ’n dubbele raadslid!” Só het een van die opgewonde omstanders Woensdagaand geskree nadat raadslid Sienah Saaiman ’n klinkklare oorwinning vir die ANC behaal het in die tussenverkiesing in Wyk 13, Paarl.
Saaiman, wat voorheen ’n proporsionele raadslid was, versit nou van stoel in die raadsaal om die Amstelhof-wyk te verteenwoordig.
Haar plek as proporsionele raadslid moet nou deur die ANC gevul word teen 4 November.
Net 37,49% (1274) van die 3398 geregistreerde kiesers het ’n draai by die stembus gaan maak.
Die ANC het 52% van hierdie stemme gewen, ’n totaal van 654.
Die DA wat die wyk in 2000 gewen het met 45%, het Woensdag slegs 17% (214) stemme getrek.
Derde was die Onafhanklike Demokrate met 16,85% (212), gevolg deur die nuutgestigte United Party of South Africa met 15,87% (112).
Die Federasie van Demokrate kon net 5,25% (66) van die stemme op hulle verenig. Sowel die FD as UPSA het hul deposito's verbeur.
More
News
|
