Eendeweer laat skool weer oorstroom
2011-06-02
Lise Beyers
VIR sommiges is die afgelope week se swaar reëns ’n seën, maar vir ander is dit ’n vloek - veral vir Weltevrede Sekondêre Skool wat die afgelope jare worstel met ’n deurdrenkte administrasiegebou in die reënmaande. Sodra dit reën, vloei ’n rivier water die gebou binne, tot in die kantore van onder andere die skoolhoof. En wat hierdie lekkasie nog erger maak, is die feit dat die water onderdeur die hoofkragbord van die skool stroom. Die beheerraad se voorsitter, Deon van Turha, vertel: “Elke jaar is dit dieselfde storie. Ons perseel sit onder die padvlak en hiér is oënskynlik nie genoegsame dreinering nie. “Die administrasiegebou bly onder water en dit maak nie saak hoeveel keer ons die water opdroog en uitvee nie, dit sypel vinnig weer binne die gebou in. “Ons vrees ook vir die feit dat die water onderdeur die kragboks uitlek - as water en elektrisiteit meng, kan dit noodlottige nagevolge hê.” Van Turha sê verder dat klagtes wat gerig word aan die Onderwysdepartement op dowe ore val. “Op die lange duur sal hierdie waterskade permanente skade aan die gebou aanrig.” * Die afgelope tien dae het die hemele behoorlik oopgegaan oor die Drakenstein-gebied. In die Paarlse middedorp is 150 mm aangeteken. Ligte sneeuneerslae het ook plaasgevind op die hoë pieke van die Limietberge. Dít het die kwik erg laat daal en ware bibberweer veroorsaak, Op plek het die kwik tot byna vriespunt gedaal. Maar die reënvalsyfer vir Mei is steeds baie minder as verlede jaar, toe byna 300 mm water geval het. Veral boere hoop dat goeie reëns verwag kan word vir die volgende paar maande. Volgens die plaaslike nooddienste is geen verdere ernstige voorvalle van oorstromings gerapporteer nie. * The winter rains have arrived, with flooding recurring at a school in Wellington.
More
News
|
