Nuwe roete vir 69ste Paarlberg-halfmarathon
2011-06-15
DIE McDonalds Paarlberg-halfmarathon, die tweede oudste wedloop in Suid-Afrika, wat vanjaar vir die 69ste keer aangebied word, sal vanjaar ’n nuwe roete hê. Die nuwe roete se begin- en eindpunt is by die Laerskool Courtrai en sluit die Taalmonument se pad in asook Hoofstraat. Dié wedloop word op 13 Augustus deur die Paarl Atletiekklub, in samewerking met die Afrikaanse Taalmuseum en -monument aangebied, ten bate van die Andrew Murray Kinder- en Jeugsorgsentrum. Atlete sal eers die volle lengte van Hoofstraat noordwaarts aandurf voordat hulle in Noorder-Paarl links gaan draai in die Jan Phillipsbergpad. Dit is ’n Boland-ligawedloop met die 21,1 km wat om 07:00 begin. Die 10 km wedloop begin om 07:10 en die 5 km pretloop om 07:20. Atlete wat wil deelneem, kan met Sybrand du Plessis by 083 444 6940 skakel. Inskrywings kan ook by Pêrel Sport in Lady Greystraat en by die Paarl Mall gedoen word.
More
News
|
