TANS in sy 13de bestaansjaar en meer omvattend as ooit, bied vanjaar se uitgawe van die SA Wine Industry Directory altesame 544 bladsye wat die vele fasette van die Suid-Afrikaanse wynbedryf se werkinge verduidelik en vereenvoudig.
Dit sluit 62 sleutelorganisasies en 1 200 produsente-besighede met 1 800 handelsmerke in. Hierdie besighede wissel regdeur die spektrum van boetiekkelders, deur privaatkelders en landgoedere tot reusagtige koöperasies en produserende groothandelaars.
’n Volledige lys van wyn- en bedryfskrywers, asook die land se wynkompetisies, riglyne oor SEB-implementering, produksiekoste-beheer en die Geïntegreerde Produksie van Wynskema (IPW) word in die gids vervat.
Dit word gepubliseer onder die VinPro-vaandel deur Wynland Publikasies en is beskikbaar teen R200 by boekwinkels of marketing@blueweaver.co.za.
