NÁ meer as twee dekades van beoordeling van die hoogste standaard, bly die Veritas-toekennings steeds die land se mees prominente kompetisie vir markklaarwyne en brandewyne met toekennings waarvoor keldermeesters behoorlik toustaan.
Wyn- en brandewynmakers moet vanjaar 10 Augustus op hul kalenders merk as die sluitingsdatum vir inskrywings. Laat inskrywings word teen ’n verhoogde fooi tot 18 Augustus aanvaar.
Sedert brandewyn verlede jaar sy debuut by hierdie gesaghebbende wynkompetisie gemaak het, kan die land se brandewynmeesters nou ook om die gesogte dubbelgoud, goud, silwer of brons medaljes meeding.
Na verwagting sal daar weer vanjaar meer as 1700 wyne en brandewyne deelneem. Die strawwe beoordelingsproses vind plaas van 5 tot 8 September by die Nederburg-veilingkompleks waar deelnemerwyne en -brandewyne deur panele spesialisbeoordelaars geproe sal word.
Nuuskierige wynentoesiaste sal egter moet wag totdat die wenwyne op 8 Oktober by die Kaapstadse Internasionale Konferensiesentrum (KIKS) bekend gemaak word.
Die nuutste Veritas-inskrywingsvorm en katalogus is aanlyn beskikbaar by www.veritas.co.za.
