NEGE gesiene internasionale beoordelaars het hulle aangesluit by die hoogs gekwalifiseerde Veritas-beoordelaarspan wat besig is om nagenoeg 1740 markklaar-wyne en brandewyne by die Nederburg Veilingkompleks te evalueer.
Sauvignon Blanc is bo-aan die lys van inskrywings met 205 wyne wat deelneem, gevolg deur Shiraz (196) en Cabernet Sauvignon (169). Die kategorie vir brandewyn wat verlede jaar vir die eerste keer by Veritas ingesluit is, het vanjaar 36 inskrywings gelok vanuit die geledere van standaard, oesjaar en potketel brandewyne.
“Die insluiting van internasionale professionele proeërs – vanjaar is daar agt wyn- en een brandewynkundige – dra by tot ’n onpartydige en internasionaal aanvaarbare uitkoms,” sê Duimpie Bayly, voorsitter van die Suid-Afrikaanse Nasionale Wynskouvereniging (SANWSV) wat jaarliks die Veritas-kompetisie organiseer.
“Die Veritas-beoordelingsmeganisme is bekend as een van die strengste in die bedryf en word deur plaaslike en internasionale rolspelers vertrou en erken.”
Entoesiaste sal tot 8 Oktober moet wag om te weet watter wyne en brandewyne vanjaar se begeerde Veritas-plakkers gaan dra.
Inligting oor publieke proegeleenthede van dubbelgoud- en goud medaljewenners wat landswyd aangebied word, is beskikbaar op die Veritas webwerf by www.veritas.co.za.
Vir meer inligting, kontak gerus vir Elsabé Ferreira by 021 807 3104 of epos elsabe@veritas.co.za.
