Peoples II hou klub se naam hoog
2005-11-17
NAT kolfblaaie het verhoed dat beide Young Peoples Krieketklub se eerste en derde spanne die naweek hul wedstryde kon speel.
Peoples II se wedstryd teen Van der Stel op Stellenbosch kon egter afgehandel word.
Dit was dan ook ’n suksesvolle uitstappie vir die Paarliete wat met twee paaltjies wen.
Goeie boulwerk deur Henley Julies (3/28 in 11bb), Hilmer Paulse (1/26 in 8bb) en Ainsley Anderson (3/29 in 12bb) beperk Van der Stel tot 187/8.
Peoples word egter met ’n bykomende 30 lopies gestraf weens 'n te stadige boulbeurt-tempo en moet dus 218 aanteken.
’n Goeie spanpoging verseker dat Peoples in die voorlaaste beurt die wenlopies behaal.
Mooi beurte is deur Edwin Jacobs (67 4x9), Brett Mitchell (35 4x5), Audin Carolissen (24 4x2) en Anderson (23 4x3) gespeel.
Peoples II se wedstryd van Sondag verskuif na Saterdag op Daljosafat en Peoples III speel weg teen Spes Bona op Stellenbosch.
More
News
|
