Paarl-Oos laat Maties knyp
2005-11-17
DIT is nooit lekker om ’n maaltyd van jou vingers te maak nie, maar die eerste krieketspanne van Paarl-Oos en Maties het Saterdag behoorlik naels gekou in hul rillerstryd op Stellenbosch.
Nadat die besoekers die loot wen, stuur hulle die studente in om te kolf.
Peter Lang (59 4x6), Warren Hayward (34 4x1) en Ferdi Geldenhuys (13 4x3) moker die bal lekker rond.
Dit is egter Warren Swan (87 4x6, 6x2) wat veral in die laaste agt beurte die boulers swaar straf.
Maties het maar 211 in die 56ste beurt gehad, maar danksy ’n warrelwind-vertoning deur Swan is die totaal na 246/8 opgestoot.
Waylain September (3/85 in 15bb en Craig Abrahams (2/45 in 13bb) was die twee Paarl-boulers wat die minste deurgeloop het.
Paarl-Oos se beurt begin op die slegste moontlike manier toe David Stevens se paaltjie met die tweede bal kantel.
Stevens moes maar weer terugkeer pawiljoen toe, nadat hy die bal op sy paaltjies gespeel het.
’n Vennootskap van 125 lopies om die tweede paaltjie tussen Manfred de Kock (55 4x3) en September het egter die besoekers se beurt weer op koers gekry.
Die waagstuk om September, wat gewoonlik op nommer ses of sewe kolf as ’n openingskolwer, in te span, het vrugte afgewerp toe die draaibalbouler 75, wat nege grenshoue ingesluit het, aangeteken het.
Die volgende twee kolwers het met ewe positiewe entoesiasme die lopies gejag, maar toe Roswin Jephtha (21 4x3) en Bruce Miller (26 (4x3) se paaltjies val, is die ritme versteur.
Paarl-Oos het op dié stadium teen ’n lopietempo van ses per beurt gekolf, maar toe het die lopies ietwat opgedroog.
Jackie Daniels (21 4x1) en Craig Abrahams (18 4x3) het moedig probeer om die teiken te haal, maar teen uitskeityd het Paarl-Oos 231/8 gehad.
John Loxton (2/54) en Roelf Jacobs (2/27) was die studente se beste boulers. Die wedstryd tussen die tweede spanne van Paarl-Oos en Maties op Allandale is afgestel weens ’n nat buiteveld.
Saterdag speel Paarl-Oos I (tuis) en II (weg) teen Van der Stel.
More
News
|
