Hoe lank wag 'n mens vir 'n antwoord?
2006-02-23
HOE lank moet ’n mens wag vir ’n antwoord van die Munisipaliteit?
In Junie 2004 het ek ’n brief geskryf om te vra vir ’n verhewe voetoorgang of stopstrate in Bo- Langstraat, Paarl.
Ons het werklik ’n ernstige probleem met motoriste en motorfietsryers wat in die straat jaag.
Inwoners van Groenvlei het reeds heelwat telefonies gekla by die Munisipaliteit in die verlede, maar hier is geen wetstoepassing snags nie.
In Oktober 2004 is ek ingelig dat daar nie in daardie begroting geld beskikbaar is vir my versoek nie.
In Maart 2005, heeltemal betyds vir die begroting, het ek weer ’n versoek ingedien, dié keer by die burgemeester.
Amper ’n jaar later, op 1 Februarie vanjaar, is ek in kennis gestel dat die Munisipaliteit voor 1 Julie ’n mini-sirkel gaan bou op die hoek van Bo-Langstraat en Hillsidestraat.
Die verkeersafdeling sal ook glo gevra word om van tyd tot tyd die nodige wetstoepassing te doen.
Of dit die oplossing is, sal ons maar moet sien. Die feit bly egter staan, as ons Munisipaliteit tussen vier en elf maande vat om ’n eenvoudige brief te antwoord, is ons in die moeilikheid.
J Lock
More
News
|
