Heel eerste handfiets-ren in Paarl
2006-03-02
DIE Paarl speel die naweek gasheer vir die Paarl Rock Handfietswedren, die heel eerste handfietswedren in die land.
Die byeenkoms word saam met die SA Padfietsrykampioenskap vir gestremdes aangebied.
Toeskouers kan uitsien na groot internasionale name wat mekaar in beide die pad- en tydtoets-wedrenne die stryd sal aansê.
Die plaaslike atlete wat ook in aksie sal wees, is die Paarliet en Paralimpiese medaljewenner, Ernst van Dyk, Neels Gouws, Gysie van der Vent (albei van Pretoria), Hilary Lewis (Johannesburg) die enigste vroue-atleet, Peter West (Bloemfontein), Sister Maseko (Johannesburg) en ’n span van Helderberg wat bestaan uit Ernest de Govueia, Andries Hogh, Gert van Wyk, Tony Williams, Gary Hille en Max Frei.
Die eerste handfietswedrenne begin Saterdag om 11:00 by Boland Park. Die dag se verrigtinge begin egter reeds om 08:00 en sal tot 13:00 duur.
Die amptelike opening sal om 09:30 wees waartydens ’n minuut van stilte vir die afgestorwe Gerald Lackey gehou sal word.
Sondag begin die tydtoets-wedrenne om 09:00.
Toeskouers kan by die Ligstraal Skool parkeer. Toilette asook stalletjies met verversings sal hier beskikbaar wees.
Vir verdere navrae kan Maranda Fourie 082-515-9860 geskakel word.
More
News
|
