Roses wen steeds
2006-04-20
DIE eerste span van Roses United Rugbyklub het sy huidige goeie vorm voortgesit toe hy voorverlede naweek Rawsonville in ’n wegwedstryd 7-3 geklop het.
Tydens dié titaniese stryd het die senter Alrich Muller die Wellingtonners se enigste drie gedruk. Die doelskop is deur John-lee Norje (skrumskakel) oorgeskop.
Die klub het oor Paasnaweek ’n baie suksesvolle spanbousessie op Lambertsbaai gehad.
Die eerste span het in winderige toestande uitstekende harloop-rugby opgedis en só die span van Lambertsbaai Marines oortuigend met 29-8 (5-3) geklop.
Die wedstryd was gekenmerk deur goeie samespel tussen die voor- en agterspelers asook goeie verdediging.
Die besoekers se drieë is deur Alrich Muller (2, senter), Deon Williams (2, vleuel) en Franzel September (flank) gedruk. Danie Roman (losskakel) en Earl Manie (heelagter) het elkeen met ’n doelskop geslaag.
Saterdag lei al die paaie na Pelikaanpark op Wellington wanneer Roses teen die gedugte span van Ceres te staan kom.
More
News
|
