Pniel kruip in hul dop teen Paarl-Oos
2005-02-16
DODELIKE boulwerk deur Paarl-Oos het Saterdag die kolwers van Pniel Coronation oorreed om eerder veilig as aggressief te speel.
Op Pniel het Paarl-Oos die loot gewen en 214/8 in hul 60 boulbeurte aangeteken.
Roswin Jephta (71nun 4x5), Mark Borchards (26 4x4), Elroy Abrahams (23 4x3) en ’n vinnige 36 in 24 (4x1, 6x1) deur Craig Abrahams het lyf gegee aan die besoekers se totaal.
Andrew Cyster (3/38 in 15bb) was Coronations se beste bouler.
Paarl-Oos het die tuisspan gou in die moeilik gehad en nadat die vyfde paaltjie met die telling op 69 val, het die Pniel-kolwers met benoudheid gekolf en slegs 122/8 ná 60 boulbeurte aangeteken.
Cyster (39 4x6) en Ryno Arendse (23 4x1) het die hoogste tellings gekry.
Die besoekers se boulaanval is deur Dennis November (2/25) en Waylin September (3/33 in 13bb) gelei. Paarl-Oos verdien 12 punte en Coronations drie.
Op Groot Drakenstein het Paarl-Oos II (270/9) en Coronations II (208/9) se wedstryd ook onbeslis geëindig.
Jarod Cupido (48 4x6), Werner Erasmus (88 4x8, 6x2), Jacques Hendricks (30 4x2), Wayne Minnies (3/51) en Mario de Kock (2/33 na 8bb) was Paarl-Oos se uitblinkers.
R Lackay (47 4x7), H Myburgh (41 en 3/48), en D Hendricks (4/55) was Coronations se beste spelers.
Paarl-Oos kry 10 punte en Coronations kry vyf.
Paarl-Oos III (191/10) was nie opgewasse teen Maties III (323/4) nie.
Wayne Pietersen (2/50), Ferdi Jonathan (54) en Gerswhin Davids (31) het die beste gevaar.
Saterdag speel Paarl-Oos I weg teen Worcester United, Paarl-Oos II tuis teen Bergrivier en Paarl-Oos III weg teen Brackenfell.
More
News
|
