Tiere gee UWK gas
2005-04-14
DIE Tiere van Young Peoples Rugbyklub het Saterdag verras toe hulle ’n sterk span van UWK 28-16 geklop het.
Die Paarliete het in die proses vier drieë gedruk om ’n waardevolle bonuspunt te verseker.
Peoples moes die afgelope twee wedstryde sonder heelwat van sy staatmakers klaarkom. ’n Paar jongelinge het egter hul hand opgesteek tydens die kans wat hulle gegun is.
Die onervare span van Barry Williams het soos trojane saamgespeel en hul geensins deur hul groter teenstanders laat intimideer nie.
Peoples se nuwe aanvallende benadering het vir aanskoulike rugby gesorg en UWK kon nie die pas enduit volhou nie.
Williams asook Brian Williams, Jody Davids en Delwaine Cornelissen het Peoples se drieë gedruk.
Cornelissen het met twee doelskoppe geslaag terwyl Thysie Pietersen suksesvol was met ’n strafdoel.
More
News
|
