Kind red haar ouers
2006-07-27
“EK het wakker geskrik en gevoel dat my bors baie erg brand. Toe sien ek die vlamme uit die sitkamer kom.”
Aan die woord is die 10-jarige Chrizelle Olyn wat Saterdagnag haar ouers wakker gemaak het, nadat ’n kers ’n brand in hul huis op ’n plaas in Daljosafat veroorsaak het.
Chrizelle het saam met haar ouers in ’n kamer geslaap toe sy wakker geword het. Sy het uit vrees vir haar lewe eers na die bure gehardloop om hulp te soek.
Daarna het sy haar lewe gewaag en na die brandende huis teruggekeer om haar ouers, Nicky en Jan, wakker te maak. Hulle het steeds, onbewus van die gevaar om hulle, geslaap.
“Ek het vir my ma uit die bed geruk en op my pa geskree om op te staan.
“Ek het vir ons lewens gevrees,” het Chrizelle gesê, verlig dat sy haar ouers kon red.
“Toe ons uit die huis uitstrompel het dit gevoel asof die vlamme ons rûe lek.”
Die bure het intussen met emmers water die vuur probeer blus, maar dit was tevergeefs. Die Olyn-gesin se besittings is alles vernietig.
More
News
|
