Albions net te sterk vir Belhar
2006-08-10
DIE manne van Albions Rugbyklub het Saterdag net genoeg woema gehad om vir Belhar 22-17 ore aan te sit.
Die dag het aan die senter en onderkaptein, Lincoln du Preez, behoort. Du Preez het ’n aandeel gehad in aldrie drieë wat die Paarliete gedruk het.
Hy het by twee geleenthede soos ’n vet-gesmeerde blits deur die Belhar-agterlyn gebreek wat tot drieë deur Newin Dennis (linkervleuel) en Jenovan Cornelissen (flank) gelei het.
Du Preez was ook instrumenteel in die derde drie en was saam met sentermaat Ashley Raubenheimer ’n yster op die verdediging.
Dié vertoning het sy aanwysing as speler van die wedstryd ’n uitgemaakte saak gemaak.
In die lynstane het dinge ook voor die wind verloop met die slotte, Alfredo ‘Hande’ Adams en Roderick Alles wat goed speel. Die stut, Herman Appel, wat ook terug is ná ’n besering, het die Belhar-voorry laat swoeg.
Die losskakel, Dominic Daniels, het sukses behaal met ’n strafdoel en twee doelskoppe
.
Die tweede en derde span het 8-3 en 8-0 verloor.
Die klub het Saterdag dalk ’n loslootjie. Navrae in dié verband, kan aan Stevie Williams (083-451-8967) gerig word.
More
News
|
