Peoples bring Paarl tot 'n val
2006-08-10
DIE eerste span van Young Peoples Rugbyklub het Saterdag op Daljosafat Stadion ’n stukkie roem vir homself toegeëien.
Peoples is die eerste span wat dié seisoen vir Paarl Rugbyklub in ’n ligawedstryd kon klop.
Dié 13-12 sege het dus Paarl se onoorwonne status tot ’n einde gebring.
Goeie verdediging deur die Peoples-agterlyn het gekeer dat die Paarl-spelers ’n ritme kon vind.
Daarby het die voorspelers onder leiding van die voorry, Brian Williams, Garth Lewis en Gilbert Solomons, goeie besit vir die snellers verseker.
Die tuisspan het rustyd 7-0 voorgeloop ná ’n drie deur Luantion Abelse en doelskop deur Delwayne Cornelissen.
Paarl se swaarder pak het deurgaans probeer om sy stempel op die wedstryd af te druk, maar kon nie daarin slaag nie.
Cornelissen het in die tweede helfte twee strafdoele by Peoples se totaal gevoeg.
Paarl het in die tweede helfte ’n beter vertoning gegee en twee drieë, deur Eugene Herklaas en Ernest Pietersen gedruk. Die een verbroude doelskop deur Jacques Hendricks het hulle egter in die hek laat duik.
Paarl II en III het 21-13 en 5-0 gewen.
Peoples speel Saterdag weg teen Strand. Die bus vertrek om 11:00 vanaf Groenheuwel.
More
News
|
