Paarl Post deel van wenspan
2006-08-17
DIE Boland Koerantegroep, waarvan die Paarl Post deel is, is onlangs in Kaapstad as die toppresteerder in die Media 24 groep aangewys.
Die swierige geleentheid is deur uitgelese gaste in die banketsaal van die Arabella Sheraton in die Waterfront in Kaapstad bygewoon.
Die toekenning staan as die DP de Villiers-trofee bekend, en is vernoem na Dawid (“Lang Dawid”) de Villiers, in lewe besturende direkteur van Nasionale Pers.
Die sake-eenheid Boland Koerante het vyf jaar gelede tot stand gekom.
Behalwe die Paarl Post, bestaan Boland Koerante ook uit die Distrikspos, Eikestadnuus, Hermanus Times, Overberg Venster, Caledon Kontreinuus, Worcester Standard, Breederivier Gazette, Swartlander en Weslander.
Tydens die oorhandiging het die besturende direkteur van Media24, Hein Brand, na Boland Koerante as ‘n “wen-sake-eenheid” verwys.
Die streekbestuurder van Boland Koerante, Jan Celliers, het die trofee te midde van dawerende applous namens die groep se bestuurspan ontvang.
Die mededinging was vanjaar besonder straf, en Boland Koerante moes meeding met talle groter eenhede in Media24, wat nasionale tydskrifte en dagblaaie insluit.
More
News
|
