Stoei-broers bring medaljes huis toe
2007-02-22
DIE plaaslike stoei-broers, Coenraad en Beyers de Villiers, het albei medaljes verower tydens die SA Graderingstoernooi wat onlangs op Ermelo gehou is.
Coenraad het in die gewigsklas 74kg-84kg en bo 17 jaar goud verower in beide die Grieks-Romeins en Vrystyl afdelings.
Kleinboet Beyers het in die o.17 63kg-69kg ’n brons medalje ingepalm in die Vrystyl-afdeling.
Coenraad is ook in die SA stoeispan opgeneem wat einde Maart in Egipte aan die internasionale Ibrahim Moustafa toernooi gaan deelneem. Hy sal in die Grieks-Romeinse stoeidissipline deelneem.
Hy sal ook Suid-Afrika in die Vrystyl-afdeling verteenwoordig tydens die Senior Afrika Stoeikampioenskap wat in Mei in Kairo, Egipte, plaasvind.
Albei broers stoei vir die Genesis Stoeiklub wat voorheen as die Durbanville Stoei-akademie bekend gestaan het.
More
News
|
