Albions bo in taai stryd
2007-07-19
DIE eerste span van Albions Rugbyklub het verlede Saterdag in ‘n taai kragmeting teen Belhar met 19-14 geseëvier.
Nadat Belhar hul telling met ‘n verdoelde drie geopen het, het Albions se Dominic Daniëls sy span in die wedstryd gehou deur drie strafskoppe tussen die pale deur te jaag.
Die vaste vyf het hul beste vertoning tot dusver hierdie seisoen gelewer en het hul opponente behoorlik ore aangesit.
Kort na rustyd het Daniëls met nóg ‘n strafskop geslaag, maar Albions het vir ‘n oomblik gaan slaplê wat toegelaat het dat Belhar weer agter hul doellyn gaan kuier het.
Albions het egter nie die saak daar gelaat nie en het goed saamgewerk om Alrich Erasmus vir die wendrie oor te stuur. Ashley Manuels is aangewys as die speler van die wedstryd.
Albions II het hul kragmeting 13-8 verloor en Albions III het 21-14 gewen.
More
News
|
