Boishaaiers is die room van rugbykompetisie
2007-08-16
Jacques Rossouw
DIE eerste rugbyspan van Hoër Jongenskool Paarl is die afgelope naweek bekroon as die wenner (groot skole) van Die Burger se rugbykompetisie wat by Hoërskool Hugenote op Wellington aangebied is.
’n Erg verswakte HJS-span het Donderdag tydens ’n naelbyt-halfeindstryd 13-11 teen Framesby geseëvier om hul plek in die finaal te verseker.
Die Paarliete was tot in die laaste minuut agter, maar ’n strafskop voor die pale het losskakel Matthew Möhle die geleentheid gegee om die wa vir sy span deur die drif te trek.
Boishaai het Saterdag ’n beter vertoning gelewer om Outeniqua (George) 21-0 verslaan.
Hugenote het self tydens hul semi-finaal (medium-grootte skole) ’n harde stryd gehad om 8-5 met Oudtshoorn klaar te speel.
Die Wellingtonners het egter harde bene gekou tydens die finaal nadat Brandwag (Uitenhage) hulle 19-11 geklop het.
* Hoërskool Paarl Gimnasium was veronderstel (as top skool in die WP) om die halfeindstryd teen Framesby te speel, maar was nie beskikbaar vir die kragmetings nie en het HJS die geleentheid gegee om te speel.
More
News
|
