Polisieman op en wakker
2007-08-16
VIER mans, insluitend twee minderjariges, is Donderdag op heterdaad in die Paarl betrap toe hulle met gesteelde goedere wou ontsnap.
’n Polisieman van Robertson wat van diens af was, het toevallig op die Paryspad gery toe hy op die verdagte toneel afgekom het.
Die mans was te voet met besproeiingspype onderweg vanaf Groot Parys plaas na ’n motor langs die pad.
Die polisieman het dadelik die Paarl polisiekantoor gekontak en die mans is in hegtenis geneem.
Na verdere ondersoek is daar vasgestel dat hul voertuig in Worcester gesteel is.
* Twee mans is die afgelope naweek aan meswonde dood.
Vroeg Sondagoggend is Jan Swarts (19) op die trappe van Blesbok-woonstelle doodgesteek tydens ’n onderonsie met ’n ander man. Hy het ’n meswond in sy nek opgedoen.
Johan Michaels (43) is in verband met die voorval in hegtenis geneem.
Voorverlede naweek het ’n soortgelyke voorval voor ’n smokkelhuis in Magnolia plaasgevind.
Die sewentienjarige Clinton Fouché van Plumbagolaan, Lantana, is ook dood aan ’n meswond in die nek.
Cameron Claasen (22) is in verband hiermee in hegtenis geneem.
Nog ’n slagoffer, Eric Komani (34) is in Groot Drakenstein dood, ook toe hy met ’n mes gesteek is. Patrick Mbalo is in hegtenis geneem.
More
News
|
