Gesels kopstukke
2007-08-23
DIE gesels kan nog op ’n drafstap gaan oor goeie lopies of verbroude kanse op die rugbyveld, maar as die skaapkop bedien word, en die messe word oopgeknip, dan daal daar ’n stilte neer soos voor ’n nou-of-nooit skop pale toe.
Dis nou by Laborie Restaurant in Suider-Paarl, by die gereelde afval- en skaapkop-etes, waar die gaste so sak om die tafels.
Die volgende spesiale middagete is wildsnekpotjie en afval môre-aand, met die laaste van die skaapkopetes op 31 Augustus.
Daar is net 32 kaartjies (teen R100) vir elke ete beskikbaar. Vier lang tafels word in die restaurant se private eetkamer voor ’n reuse-kaggel gedek.
Gaste moet elkeen ’n eie knipmes saambring, maar sal daar van ’n servet-borslap voorsien word.
Behalwe ’n goeie humorsin wat moet saamkom, lui die uitnodiging, mag gaste elkeen ’n bottel wyn gratis na die tafel bring.
Vegetariërs moet eerder hierdie Vrydagmiddae tussen 12:00 en 14:00 nie by die private eetkamer inloer nie. Dit sal so erg wees as wat dit destyds was toe Naas Botha vir WP gekies is.
Kontak Lizelle of Hetta by 021-807-3093 vir meer inligting of bespreking.
More
News
|
