Forensiese sentrum verrys
2007-08-30
David Joshua
DIE nuwe Forensiese Patologie Laboratorium en lykshuis vir die Paarl is tans in aanbou in Broadwaylaan langs TC Newman Daghospitaal in Paarl-Oos.
Die Departement van Openbare Werke is verantwoordelik vir die oprigting van die gebou, wat bestuur sal word deur die Departement Gesondheid.
Dit is reeds ver gevorder sedert bouwerk in Februarie vanjaar begin is en daar word beplan om die gebou teen Maart volgende jaar te voltooi.
Die oppervlakte van die gebou beslaan omtrent 1100 vierkante meter en die boukoste is sowat R11 miljoen. Daar is hoofsaaklik van plaaslike arbeid en subkontrakteurs gebruik gemaak.
Die sentrum voorsien in ’n dringende behoefte nadat die beheer van die lykshuisfasiliteit van die polisie aan die Departement van Gesondheid oorgedra is.
Die gebou bestaan uit ’n administrasieblok en publieke ontvangs, onderhoudskamer, vier dokterskantore, kamers vir lykuitkenning en ’n groot disekteerarea van bykans 200 vierkante meter.
More
News
|
