Oneerlike hondsmous
2007-10-25
EK verwys na die brief oor “Hondekopery sonder waarborg” in verlede week se Paarl Post.
My dogter het verlede jaar met waarskynlik dieselfde vrou ‘n hondekopery aangegaan. Min of meer dieselfde werkwyse as met die Porterville-mense is toe ook gevolg.
‘n Miniatuur Malteser is vir R600 gekoop; indien die hondjie geregistreer sou word, sou die bedrag R1000 wees.
Hoewel Yolanda, die hondeverkoopster van Generaal Hertzogrylaan 181, Berg-en-Dal, Wellington (selnommer 082-670-3276), voorgegee het dat die hondjie ses weke oud was, kon die dingetjie nog nie behoorlik loop nie.
Boonop moes hy aanvanklik met ‘n drupper gevoer word! Tydens die verkoop, kon die hondjie hoogstens drie weke oud gewees het.
Hondjie het egter begin groei, en groei, en groei! Uiteindelik het hy nie meer in sy hokkie gepas nie, en was die erf hopeloos te klein vir hom. Hy het soos ‘n wit skaaphond begin lyk!
Yolanda gaan steeds voort met haar gewetenlose praktyk. Tans verkoop sy miniatuur Dobermanns vir R1000; die geregistreerdes is R4000 elk.
Iemand moet iewers ingryp en hierdie hondeverkoper aan die pen laat ry. Dalk kan die DBV iets doen.
Teen die tempo wat hierdie boereverneukery plaasvind, wonder ek of SARS darem ook ‘n regmatige deel kry!
Honde-Ouma
More
News
|
