DIE Waarnemende Hoof: Gemeenskapsdienste van die Munisipaliteit, mnr Tommy Matthee, het in die berig “Brandweer in die knyp” in Paarl Post van 8 November 2007 gesê dat Drakenstein nog steeds ‘n professionele brandweerdiens lewer.
Volgens my navorsing gedoen op www.stansa.co.za vereis SANS 10090:2003 Edition 3 dat ’n brandoproep binne 15 sekondes beantwoord word, dat daar twee brandweermasjiene elk beman met vyf brandbestryder en pompkapasiteit van meer as 3850 liter per minuut binne 8 minute by die noodtoneel moet arriveer.
Kan die belastingbetaler dus aanneem dat die diens wel so in Drakenstein gelewer word?
Indien nie, is dit soos ’n bekende pizza-afleweringsdiens “as die pizza koud is, is die pizza gratis”, of dan in hierdie geval - indien die brandweer nie voldoen aan bogenoemde standaarde nie, is die diens dan gratis, of gaan Drakenstein my vergoed vir onnodige lewens- en eiendomsverlies as gevolg van tekort aan personeel en/of toerusting en/of laat opdaag?
Hoe kan daar ooit na waarde vergoed word vir lewensverlies?
