DIE eerste span van GMT Paarl-Oos Krieketklub het die afgelope naweek tydens ’n wegwedstryd met Malmesbury klaargespeel.
Die Paarliete het met ekonomiese boulwerk hul teenstanders onder druk geplaas en sodoende ook die nodige paaltjies ingepalm. Dennis November (2/13), Jade Adams (2/42), Hubert Ontong (2/24) en Wayne Minnies (3/9) het gesorg dat Malmesbury slegs 122 lopies kon aanteken.
Die besoekers het die telling suksesvol nagejaag om die wedstryd uiteindelik met ses paaltjies te wen. Elroy Abrahams (26), Waylon September (36, 1x4 en 1x6) en Bruce Miller (47, 3x4 en 1x6) was Paarl-Oos se uitblinkers met die kolf.
Paarl-Oos II het by die New Orleans-veld 272 lopies aangeteken om Malmesbury stert tussen die bene huis toe te stuur. Werner Erasmus (119, 13x4 en 3x6), Ferdi Jonathan (37, 6x4), Clayton Blommetjies (49, 6x4 en 1x6) en Wade Adams (24*, 3x4) het grootliks bygedra tot die tuisspan se totaal.
Malmesbury het egter gesukkel teen die Paarliete se dodelike boulaanval.
Blommetjies (2/32), Wilton van Neel (2/19) en Kurt Julius (5/17) het die grootste verwoesting gesaai om Paarl-Oos met 145 lopies te laat seëvier.
* Paarl-Oos I speel Saterdag tuis teen Wellington terwyl die tweede spanne mekaar in Wellington gaan pak. Die derde span speel tuis teen Northdene.
