DIE plaaslike rugbyspeler Juan de Jongh (19) is onlangs by ’n voorlopige groep van die Vodacom Stormers ingesluit wat eersdaags ’n oefenkamp in George gaan bywoon.
Hierdie groep is byeengeroep met die oog op voorbereiding vir die 2008 Super 14-reeks.
De Jongh het vroeër vanjaar vir die Westelike Provinsie se suksesvolle o.19-span uitgedraf terwyl hy ook as deel van die Opkomende SA Sewesspan aan ’n toernooi in Kenia deelgeneem het.
Hierdie oud-leerder van Hoërskool Hugenote is verder ook by die SA o.20’s opgeneem wat tans besig is met ’n oefenkamp in Saldanha.
De Jongh is ’n lewendige buite-senter wat nie net vinnig van die merkie af is nie, maar ook redelik sterk vertoon op die verdediging.
Alhoewel hy verkies om diens in die middeveld te lewer, kan hy ook ewe effektief op heelagter en vleuel aangewend word.
