DIE Rhadsport Fietsryklub bied Saterdag hul jaarlikse baanbyeenkoms by die Faurestraat-stadion aan.
Hierdie geleentheid is ‘n goeie aanduiding wie die gunstelinge vir die Boxing Day Sports se 25 myl wedren sal wees.
Vanjaar sal ‘n nuwe item, die 30-ronde Madison wedren, aangebied word.
Verskeie bekende jaers soos Garth Thomas, Nolan Hoffman (altwee van die Paarl) en Chris Willemse jnr het reeds hul deelname bevestig.
Met die oog op die Junior Wêreldkampioenskap wat volgende jaar in Bellville aangebied word, sal twee wedrenne spesiaal vir juniors tydens Saterdag se byeenkoms plaasvind.
Hier sal ryers soos Clint Hendricks, Brandon Christians, Robin November en Grant Stuurman sake uitspook.
* Toegang by hierdie geleentheid is gratis en almal is welkom.
