Medalje vir Wellingtonner
2008-03-27
DIE Raad van die Suid-Afrikaanse Akademie vir Wetenskap en Kuns het verlede week verskeie bekronings aangekondig. Onder die ontvangers is Wellingtonner dr Michael le Cordeur, ’n streeksbestuurder van die Wes-Kaapse Onderwysdepartement. Hy ontvang die Elizabeth C Steijn medalje vir ’n leerkrag wat sy/haar opvoedingswerk deur medium van Afrikaans doen en wat hom/haar onderskei het op die gebied van praktiese onderwys en opvoeding binne, sowel as buite die klaskamer. Dit is vernoem na Elizabeth C Steijn, wat vir baie jare die hoof van die Afrikaanse Hoër Meisieskool in Pretoria was en word net elke derde jaar toegeken. Die prys sal tydens ’n bekroningsplegtigheid op Stellenbosch oorhandig word op 20 Junie. Dr Le Cordeur het op drie terreine buitengewone sukses in die onderwys behaal: eerstens as vakonderwyser in Afrikaans, Engels en Wiskunde, asook met ’n leidende rol in talle buitemuurse aktiwiteite. Tweedens is sy onderrig ondersteun deur diepgaande navorsing en derdens toon sy uitgebreide lys van publikasies dat hy sy akademiese kennis toegewyd toepas en toewy aan die bevordering van die onderrig van Afrikaans op ’n breë front. Hy is ook voorsitter van die Wes-Kaapse Taalkommissie. Ander ontvangers van die 18 medaljes en erepennings sluit in Breyten Breytenbach (Hertzogprys vir Poësie), prof TT Cloete, prof Stefans Grové, sakeman Jannie Mouton, aktrise Antoinette Kellerman en sanger Jannie du Toit.
More
News
|
