Vroue vat misdaad vas
2005-03-09
HULLE noem hulself die Lifesavers, want hulle wil veral die lewens van vroue red deur verkragtings in hul omgewing te verhoed.
So gesels die lede van die nuwe buurtwag van Wyk 21 in Vanwyksvlei, Wellington, wat sedert November veral oor naweke besig is om misdaad in hul omgewing te bekamp deur hul sigbare teenwoordigheid.
“Ons het net gevoel hier is te veel misdaad in Vanwyksvlei, en dat ons kinders dalk onder die invloed van bendes val,” verduidelik voorsitter Vellerie Cyster.
Die groep bestaan meestal uit vroue, maar dit laat hulle nie terugdeins vir die taak op hande nie. Hulle het al ‘n arrestasie gemaak en moontlike verkragtings voorkom deur verdagte persone aan te spreek.
En, sê hulle, misdaad is definitief minder vandat hulle met hul fietse en glimbaadjies die gebied rondom veral Abdurahamanweg en die Vanwyksvlei sportgronde patrolleer.
Die buurtwag is ingeskakel by die Wellington
Gemeenskapspolisiëringsforum, en word ondersteun deur die plaaslike Misdaadsvoorkomingsaksie van die SAPD. Voorsitter Vellerie Cyster het enigiemand van die wyk uitgenooi om as lede by die inisiatief aan te sluit en die buurtwag te ondersteun.
More
News
|
