Paarlse legende oorlede
2005-06-30
’n PAARLSE legende, Ronnie Bourbon-Leftley (83), is verlede week ná ’n kort siekbed oorlede.
Ronnie het hom, ná diens in Noord-Afrika gedurende die Tweede Wêreldoorlog, op die plaas Waterpoel in die Agter-Paarl gevestig.
Hy het later op die dorpsplaas Vredenburg geboer en betrokke geraak by distriksake as jarelange voorsitter van die destydse Afdelingsraad.
“Ronnie was ’n regte gemeenskapsmens,” onthou sy vriend Marius de Jager.
“Hy was sonder tierlantyntjies en het opreg omgegee vir die distrik en sy medemens.”
Ronnie het baie gedoen vir die verbetering van arbeiderbehuising op plase en was nou betrokke by die begin van streeksbeheer.
“Elke Sondag het hy sy kar gevat en in die distrik gaan kyk wat aangaan, of die paaie vrot is, en of onwettige ontwikkelings gedoen word,” sê Marius, wat destyds by die Afdelingsraad gewerk het.
Hy het op verskeie gemeenskapskomitees gedien en was betrokke by die stigting van die Antoniesvlei-ontspanningsterrein by Wellington.
Volgens sy familie was hul pa vir hulle almal ’n inspirasie.
“Hy was altyd daar vir ons, altyd positief en het vir ons oor die jare baie wyse raad gegee,” onthou hulle.
Ronnie word oorleef deur sy vrou Carina, seuns Billy en David wat in die Paarl boer, dogter Heléne Visser van Bloubergrant, agt kleinkinders en twee agterkleinkinders.
Die gedenkdiens en teraardebestelling was gister by die Strooidakkerk.
More
News
|
