VANDAG is ’n enkelma van Greenfields, Paarl, ten gron- de nadat haar driejarige seun op die drumpel van hul woning deur ’n bakkie doodgery is.
En dié tragedie kom enkele maande nadat sy al haar besittings verloor het toe haar huis deur ’n brand in puin gelê is.
Volgens Anneline van der Westhuizen, by wie Margaret Swanepoel en haar seun Stefan Swanepoel tuisgaan, het klein Stefan Sondagmid- dag rustig met sy karretjie op die sypaadjie buite die huis in Flamingostraat gespeel.
“’n Bakkie was halfpad op die sypaadjie geparkeer en Stefan het voor die bakkie gespeel.
“Ons het ons rug vir letterlik minute gedraai, toe die bestuurder van die bakkie wegtrek. Hy kon nie vir klein Stefan op die grond sien nie, en is bo-oor hom.”
Inwoners van Flamingo- straat is ten gronde na dié gebeurtenis, wat hulle ’n fratsongeluk noem.
“Almal was baie lief vir Stefan. Hy was ’n ware sonskynkind in hierdie straat, en sy tragiese dood laat ’n reuse-leemte.”
Stefan se ma is steeds te getraumatiseerd om oor die voorval te praat. Haar huis is weg en nou ook haar kind.
“Ek het my huis aan Margaret oopgestel nadat sy alles in die brand verloor het. Ons het gedink sy het alles verloor, maar nou het sy werklikwaar niks.
“Sy het nie die geld om vir Stefan se begrafnis te betaal nie. Ons weet nie hoe ons hom ter ruste gaan lê nie.”
* A young boy died when a bakkie drove over him in Greenfields
