Rugbyklubdinee vier 125 jaar
2008-10-16
AS deel van die Paarl Rugbyklub se 125-jarige bestaansjaarfeesvieringe, word ’n spogdinee op 23 Oktober in die geselskap van seëvierende Springbokbreier Jake White gehou. Die Paarl Rugbyklub is die derde oudste gekonstitueerde klub in die land en het sedert sy bestaan 13 Springbokke en 72 WP rugbyspelers opgelewer. Dit is hier waar legendes soos Boy Louw, Neels Krige, Chum Ochse en Theuns Briers met hul rugbyloopbane begin het. Die dinee, wat beloof om ’n hoogtepunt op die Paarl se sosiale kalender te wees, vind plaas in die vertoonlokaal van Paarlberg BMW, met John Gainsford as seremoniemeester. Kaartjies is beskikbaar teen R5000 vir ’n tafel van tien persone. Die ete en wyne is by die prys ingesluit. Die bestuur van die Paarl Rugbyklub nooi graag die sakegemeenskap van die Paarl uit om deel te wees van hierdie spesiale geleentheid. Vir verdere navrae en besprekings, skakel Kosie Nelson by 021-872-3317.
More
News
|
