Pou glo doodgeslaan
2008-10-23
’n ALLEENLOPER pou wat dikwels verantwoordelik was vir ’n skouspel in die omgewing van die Grande Roche Hotel in die Paarl, is onlangs vermoedelik met ’n kierie doodgeslaan. Talle inwoners van die gebied was verlede week woedend toe die nuus versprei het dat ’n afgetrede inwoner van die gebied na bewering die mannetjies-pou doodgeslaan het. Die afgelope jaar het hierdie pou inwoners vermaak met sy skouspelagtige gepronk tussen die trop tarentale waarmee hy saamgeloop het. Maar volgens inwoners het die pou skielik spoorloos verdwyn. Daar word geglo dat ’n inwoner wat gekla het oor die geraas wat die pou maak, die voël in sy tuin ingewag het met ’n kierie. Toe hy binne trefafstand kom, was die mak pou se doppie geklink. En nou wag sy bure net om te sien of die oortrede met ’n pouveer in sy hoed gaan rondloop. “As die pou vir hom so erg gepla het, kon hy net natuurbewaring geskakel het, en hulle kon die pou gevang en na ’n plaas vervoer het. “Om hom koelbloedig dood te gemaak het oor ’n bietjie mis en raas is onaanvaarbaar,”meen een buurman. * A peacock was allegedly beaten to death by a pensioner.
More
News
|
