Ingenieur ernstig beseer
2005-07-28
‘n OUD-PAARLIET, Gareth October (23) van Port Elizabeth, verkeer tans in die waakeenheid van ‘n privaathospitaal in dié‚ stad nadat hy verlede naweek in ‘n kop-aan-kop botsing betrokke was.
Hy het ernstige hoofbeserings en veelvuldige beenbreuke opgedoen. Hy is in ’n koma.
Volgens ‘n familielid kon dokters teen Maandag nog nie op hom opereer nie, want hy het baie bloed verloor en het hy breinswelling ondervind.
Sy ouers, Willie en Merle October van Conradiestraat in die Paarl, is erg geskok en het onmiddellik Port Elizabeth toe vertrek om by hom te waak.
Gareth is werksaam as meganiese ingenieur by Ford in Port Elizabeth en het vanaf ‘n motorbyeenkoms teruggekeer toe die ongeluk gebeur het.
Hy het aan Klein Nederburg Senior Sekondêr gematrikuleer en verder studeer aan Skiereiland Technikon. Hy het twee jonger broers, Wilmer en Alistair.
Teen gister was hy stabiel, maar steeds aan ’n asemhalingsmasjien gekoppel.
More
News
|
