Nuwe pos
2009-05-28
NA ’n loopbaan van 27 jaar in die onderwys as taalonderwyser, departementshoof, adjunkhoof, skoolhoof en kringbestuurder, het dr Michael le Cordeur besluit om die professie vaarwel te roep toe hy ’n pos aan die Fakulteit Opvoedkunde van die Universiteit van Stellenbosch aanvaar het. Dr Le Cordeur beskik oor ’n doktorsgraad in die opvoedkunde en ’n meestersgraad in kurrikulumstudie. In sy nuwe pos sal hy hom besig hou as lektor in die didaktiek van Afrikaans op nagraadse vlak, en navorsing doen oor die verbetering van leerders se leesvermoë. Le Cordeur is voorsitter van die Wes-Kaapse Taalkommissie,voorsitter van die Breytenbach-sentrum, raadslid van die Afrikaanse Taalmuseum, voorsitter van die Wellington Krisantevereniging en die skrywer van artikels en boeke. Hy is in 2008 deur die SA Akademie vir Wetenskap en Kuns bekroon met die Elisabeth Steijn-medalje vir sy bydrae tot onderwys.
More
News
|
