Skoliere leer van CPUT kursusse
2009-09-03
Johan Nel
’n OPE dag vir matrikulante om die verskeidenheid kursusse wat by die Wellington-kampus van CPUT aangebied word, bekend te stel is, is onlangs aangebied. Die ope dag is gereël deur studente wat die kursus in toerisme-bestuur by CPUT se Wellington-kampus volg. Nadia Berg, dosent by die toerismedepartement, sê dat toerisme-studente in hulle tweede jaar die geleentheid kry om self sulke geleenthede te reël om praktiese ondervinding op te doen in die reël van byeenkomste soos sportfeeste en ander geleenthede wat toerisme na ‘n streek of dorp sal bevorder. CPUT se kususse in toerisme-bestuur, sportbestuur, rekeningkunde asook in kantoorbestuur en tegnologie is aan die besoekende matrikulante bekend gestel. Volgens Etienne Joubert, kursus-koördineerder in sportbestuur, gaan hulle aanstaande jaar vir die eerste keer studente ook in vakke soos avontuursport by die Wellington-kampus oplei. Voornemende studente wat in 2010 kursusse aan die Wellington-kampus van CPUT wil volg, kan 021-864-5511 skakel.
More
News
|
