Reëns gee somer-hoop
2009-10-15
Lise Beyers
DIE knalle van donderweer Sondagmiddag het nie net welkome reën gebring nie, maar waarskynlik ook die einde van die winter aangekondig. Of so beweer die ou boere wat staatgemaak het op jaarlikse weerspatrone, in plaas van nuwerwetse tegnologie om die weer te voorspel. Maar hoe dit ook al sy, het daar die afgelope winter genoeg reën geval om vir ’n goeie oes te sorg, sê hulle, al was dit nie heeltemal so baie soos verlede jaar nie. Alhoewel die winter vanjaar verwoed begin het met 288mm water wat in Junie oor die Paarlse middedorp uitgesak het, was Julie se reën weer minder, met slegs 131mm (in vergelyking met verlede jaar se 286mm in dieselfde gebied). Augustus het 109mm gebring in vergelyking met 185mm in 2008, September se reëns was 110mm, waar laas jaar 214mm geval het, en tot dusver staan Oktober op 37mm, waar daar slegs 21mm verlede jaar neergesak het in hierdie mooiste maand. Die enigste kommer is dat, indien die reën nie nou binnekort bedaar nie, donsskimmel op wingerde begin vorm. Die omliggende damme is byna almal 100 persent vol, met Wemmershoek wat op 99,2% staan, Voëlvlei op 97,2% en die Bergrivierdam wat steeds oorloop. Die Theewaterskloofdam is ook meer as 100% vol. En terwyl talle mense kla dat die winter moet end kry, gaan hulle spyt wees tydens Februarie se beloofde versengende hitte.
More
News
|
