Plaaswag-aksie in Wellington
2009-11-26
AL die lede van die Wellingtonse Plaaswag, wat die polisie van Wellington bystaan in die polisiëring van die landelike gebiede om die dorp, het verlede week op hul jaar-eindfunksie elkeen ’n splinternuwe T-hemp as deel van hul mondering ontvang. Volgens inspekteur Pierre Hugo, hoof van sektor vier van die Wellingtonse polisiediens waaronder die plaaswag val, beskik Wellington oor ’n hoogs-gemotiveerde en deeglik-opgeleide plaaswag wat reeds sedert 2004 aktief is. Eugene Meadon, bestuurder van Strategic HR Services wat die T-hemde vir die plaaswag borg, sê hy is beïndruk met die hoë vlak van paraatheid van die Wellingtonse plaaswag. “Hulle is ’n toegewyde groep mense wat hulle taak naweek na naweek met groot entoesiasme aanpak.” Superintendent Johan Barkhuizen, bevelvoerder van die Wellingtonse polisie, het die lede van die plaaswag geloof vir hul lojaliteit en pligsgetrouheid. Inspekteur Hugo sê dat die plaaswag elke naweek ’n gebied patrolleer wat oor meer as 300 plase rondom Wellington strek. Daar word op sommige aande gedurende die naweek bykans 300 kilometer in patrollievoertuie afgelê om sigbare polisiëring toe te pas en om probleme te ondersoek. Dié tamaai taak verloop volgens hom naweek na naweek seepglad danksy die entoesiasme en toewyding van al die lede van die plaaswag.
More
News
|
