Seun sterf aan kanker
2010-04-01
’n TIENERSEUN van die Paarl het Vrydagaand sy stryd teen kanker verloor. Verlede week nog het Stephen du Toit (15) hernieude hoop gehad nadat ’n geskikte skenker gevind is sodat hy ’n beenmurgoorplanting kan ondergaan. En sy pa, polisieman Morné, was druk besig om Stephen se vierwiel-aangedrewe motorfiets vir hom te omskep na sy eie spesifikasies, sodat dit reg sou wees vir sy tuiskoms. Stephen was verlede jaar ’n aktiewe graad 9 leerder aan Hoërskool Labori, maar is in Mei met bloedkanker gediagnoseer. Hierna het hy en sy familie ’n dapper maar taai stryd gevoer teen dié siekte, en daar was onlangs nog hoop dat die stryd gewen kon word. Hy is verlede week na Panorama Hospitaal om gereed te maak vir die oorplanting, maar Vrydag het hy ’n terugslag beleef toe hy ’n longinfeksie opgedoen het. Hy is dieselfde aand oorlede. Familielid, Jacolene Schaffer, het gesê dat Stephen tot op die laaste positief was dat hy sou herstel. “Hy wou net weer op die rug van sy vierwieler klim.” Johan Batt, skoolhoof van Labori, het gesê dat hy en sy personeel diep geskok is deur Stephen se dood. “Hy het goed gevorder en ons het gehoop dat hy volgende kwartaal weer by ons sou aansluit.” Stephen word oorleef deur sy pa, ma Lindie en suster Melandie (12). Hy is gister vanuit die NGK Paarlvallei ter ruste gelê.
More
News
|
