Raad 'systap'
2010-04-08
TERUGRAPPORTERING is ’n groter probleem binne Drakenstein as wat die delegering van opdragte is. Só het Koos Louw, DA-raadslid, tydens voorverlede week se munisipale raadsvergadering opgemerk, waar daar ’n besluit geneem is oor hoe die nuwe delegasiestelsel van Drakenstein Munisipaliteit gaan lyk. Adv Jan Koekemoer, ’n kenner van munisipale wetgewing, het onlangs dié stelsel hersien in opdrag van die Raad. Besorgdheid oor of die Raad sy verantwoordelikhede wil systap deur die verslag so te aanvaar, is uitgespreek. Die DA het by monde van Louw gesê dat hulle baie ten gunste van só ’n stelsel is, maar dat daar te min tyd was om die verslag van 150 bladsye behoorlik onder oë te neem. Charmaine Manuel, burgemeester, het in antwoord hierop gesê die verslag is in lyn met wetgewing en dat die Raad nie aangestel is om die administrasie te “mikro-bestuur” nie. Die verslag is aanvaar, maar raadslede sal nou ’n spesiale werkswinkel hou om die verslag se besonderhede te bespreek.
More
News
|
